National Parliamentary Library of Georgia

პირველი საუნივერსიტეტო გაზეთი გამოვიდა 1927 წელს, რედაქტორი აკაკი შანიძე გახლდათ. 1928 წელს გაზეთს სახელწოდება შეეცვალა და „პროლეტარულ სტუდენტთა ხმა“ დაერქვა. 30-იანი წლების ბოლოს, გაზეთს კვლავ შეეცვალა სათაური და მისი სახელწოდება გახლდათ „ბოლშევიკური კადრებისათვის“. 1951 წელს გაზეთს „ახალგაზრდა სტალინელი“ ეწოდა. სტალინის გარდაცვალებისა და მისი კულტის დაგმობის შემდეგ, გაზეთს კვლავ შეეცვალა დასახელება და მას უკვე ნახევარ საუკუნეზე მეტია, რაც „თბილისის უნივერსიტეტი“ ეწოდება. "თბილისის უნივერსიტეტში" თავიანთი პირველი ნაწარმოებები დაბეჭდეს დღეს საყოველთაოდ აღიარებულმა შემოქმედებმა: ნოდარ დუმბაძემ, თამაზ და ოთარ ჭილაძეებმა, ზაურ ბოლქვაძემ, ვახტანგ ჯავახაძემ, ლია სტურუამ, თამარ ჯავახიშვილმა, ტარიელ ჭანტურიამ, ემზარ კვიტაიშვილმა, მუხრან მაჭავარიანმა, გივი გეგეჭკორმა, მერაბ ელიოზიშვილმა, რაულ ჩილაჩავამ, გივი ალხაზიშვილმა და სხვებმა. 2006 წლის ივნისიდან გაზეთი „თბილისის უნივერსიტეტი“ ახალი, თანამედროვე დიზაინითა და მკვეთრად შეცვლილი თემატური მასალებით გამდიდრებული მიეწოდება მკითხველს.